About NDRA

Hay’adda Qaxoontiga iyo Barakacayaasha Qaranka (HQBQ) waxa uu Madaxweynaha Jamhuuriyadda Somaliland ku Aasaasay Digreeto Madaxweyne 03/01/2018, waa hay’ad ka shaqaysa Arrimaha Qaxoontiga/Magangelyo doonka, Barakacayaasha, Muwaadiniinta dalka dib loogu soo celiyo iyo Tahriibayaasha sharci darrada ah.

Hay’addu waxa ay ka shaqaysaa oo ay xafiisyo ku leedahay gobollada dalka oo dhan waxaana ay taageero siisaa dadka qaxoontiga ama Magangelyo doonka ah, Barakacayaasha, muwaadiniinta dalkooda dib loogu soo celiyo iyo dadka tahriibayaasha ee wadanka kasoo gala xuduudaha si loogu helo daryeel iyo xal waara.

Xilka iyo Waajibaadka shaqo ee HQBQ

  1. Xilkii iyo Waajibaadkii Wasaaradii hore ee Dib-u-dejinta waxa loo wareejiyey Hay’adda Qaxoontiga iyo Barakacayaasha Qaranka.
  2. Iyada oo aan waxba laga dhimayn farqada sare ee qodobkan, xilka iyo waajibaadka hay’adda wax aka mid ah:
  3. In ay curiso xeerarka, siyaasadaha, Qorsheyaasha iyo Mashaariicda la xidhiidha Barakacayaasha, Qaxoontiga, soo noq-noqonaya, iyada oo la kaashanaysa hay’addaha dawladda iyo hay’addaha kale ee khuseeya.
  4. In ay abuurto, dhaqangelisana qorsheyaasha iyo Mashaariicda dib loogu dejinayo Barakacayaasha iyo Qaxoontiga soo noq-noqonaya si dib loogu dhiso nolosha Barakacayaasha iyo Qaxoontiga looguna helo xal waara.
  5. In ay hirgeliso Mashaariicda iyo adeegyada Aasaasiga u ah dib u dejinta Barakacayaasha, sida Nabadgelyada, Biyaha, Caafimaadka, Waxbarashada iwm
  6. In ay xidhiidhiso kaalmooyinka iyo deeqaha Barakacayaasha ee hay’addaha Dawladda kuwa maxaliga ah iyo kuwa caalamiga ahba.
  7. In ay qiimayso, sidoo kalena dabagal ku mashaariicda dib u dejinta iyo kaalmooyinka loo fidiyo muwaadiniinta Qaxoontiga ah ee dalka ku soo laabanaya, iyada oo la raacayo heshiisyada iyo xeerarka dalka ee khuseeya.
  8. In ay ka hawl-gasho taakulaynta iyo gacan qabashada dadka barakacayaasha ah.
  9. In ay ka hawl-gasho dib u dejinta Qaxoontiga soo noq-noqonaya iyo Barakacayaasha.
  10. In ay diiwaangeliso Qaxoontiga ajaanibka ah ee dalka ku sugan iyada oo la kaashanaysa ciidanka socdaalka iyo hay’addaha kale ee la xidhiidha, iyada oo raacaysa xeerarka iyo siyaasaadaha dalka.
  11. Xilka iyo waajibaadka kale ee ay siiyaan xeerarka dalku.